Maguire របស់ Man United វិលត្រឡប់ចូលហ្វឹកហាត់វិញ ត្រៀមប៉ះ Forest

(មេនឆេស្ទឺ)៖ ខ្សែការពារកណ្តាលរបស់ក្លិប Manchester United កីឡាករ Harry Maguire ត្រូវបានគេរំពឹងថា នឹងវិលចូលក្រុមវិញ សម្រាប់ការប្រកួតក្នុងលីគ Premier League នាថ្ងៃអង្គារនេះ ក្នុងការធ្វើជាម្ចាស់ផ្ទះស្វាគមន៍ក្រុមភ្ញៀវ Nottingham Forest បន្ទាប់ពីខកខានការប្រកួតលើកមុនដោយសារតែមានជំងឺ។ នេះបើតាមការប្រកាសពីក្លិប ហើយត្រូវបានចុះផ្សាយដោយសារព័ត៌មាន CNA នាថ្ងៃទី២៧ ខែធ្នូ ឆ្នាំ២០២២។

កីឡាករលំដាប់អន្តរជាតិអង់គ្លេសរូបនេះ បានខកខានការប្រកួតឈ្នះ ២-០ របស់ក្លិប United លើគូប្រជែង Burnley កាលពីសប្តាហ៍មុន ធ្វើឲ្យពួកគេឡើងទៅវគ្គ ៨ក្រុមចុងក្រោយនៃពាន League Cup។
«យើងមានបញ្ហាមួយចំនួនជាមួយនឹងបញ្ហាជំងឺដូចជា Harry Maguire ប៉ុន្តែគាត់បានវិលត្រឡប់ទៅកាន់ទីលានហ្វឹកហាត់វិញហើយនៅថ្ងៃសុក្រ ដូច្នេះខ្ញុំពិតជារីករាយណាស់» នេះបើតាមសម្តីអ្នកចាត់ការ Erik ten Hag បានប្រាប់សារព័ត៌មាន។
ជាមួយគ្នានោះ ខ្សែការពារសញ្ជាតិអាហ្សង់ទីន Lisandro Martinez និងសញ្ជាតិបារាំង Raphael Varane មិនទាន់អាចចូលលេងបានទេ ដោយសារពួកគេមិនទាន់វិលត្រឡប់មកវិញ ក្រោយលេងក្នុងវគ្គផ្តាច់ព្រ័ត្រ World Cup។
សូមជម្រាបថា United កំពុងស្ថិតនៅចំណាត់ថ្នាក់ទី៥ ក្នុងតារាងលីគ ដោយមាន ២៦ពិន្ទុពី ១៤ប្រកួត និងមាន ៣ពិន្ទុនៅពីក្រោយក្រុមចំណាត់ថ្នាក់ទី៤ Tottenham Hotspur៕