លោក ចូ បៃដិន៖ «បើតាមញាណរបស់ខ្ញុំ រុស្ស៉ីនឹងវាយលុកអ៊ុយក្រែន នៅប៉ុន្មានថ្ងៃទៀតប៉ុណ្ណោះ»

(ម៉ូស្គូ)៖ ប្រធានាធិបតីអាមេរិកលោក ចូ បៃដិន បានថ្លែងនៅថ្ងៃព្រហស្បតិ៍ សប្តាហ៍នេះថា ឥឡូវនេះមានការចង្អុលបង្ហាញកាន់តែច្រើនថា រុស្ស៊ីគ្រោងនឹងឈ្លានពានអ៊ុយក្រែន នៅក្នុងរយៈពេលប៉ុន្មានថ្ងៃខាងមុខទៀត ហើយពួកគេក៏កំពុងរៀបចំ «លេស» ដើម្បីបង្ហាញអំពីភាពត្រឹមត្រូវ ក្នុងការឈ្លាននោះផងដែរ បន្ទាប់ពីកងកម្លាំងអ៊ុយក្រែន និងក្រុមឧទ្ទាមគាំទ្រដោយទីក្រុងម៉ូស្គូ បានបាញ់បោះដាក់គ្នាមួយប្រាវ នៅភាគខាងកើតអ៊ុយក្រែន។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃសុក្រ ទី១៨ ខែកុម្ភៈ ឆ្នាំ២០២២។

លោក ចូ បៃដិន បានថ្លែងប្រាប់ក្រុមអ្នកសារព័ត៌មាន នៅសេតវិមានទីក្រុងវ៉ាស៊ីនតោន យ៉ាងដូច្នេះថា «យើងមានហេតុផលក្នុងការជឿថា ពួកគេបានចូលរួមក្នុងប្រតិបត្តិការ បង្កើតទង់ក្លែងក្លាយមួយ ដើម្បីធ្វើជាលេសក្នុងការវាយលុក។ រាល់ភស្តុតាងដែលយើងមាន គឺពួកគេបានរៀបចំវារួចជាស្រេច ដើម្បីធ្វើដំណើរចូលទៅអ៊ុយក្រែន និងវាយប្រហារអ៊ុយក្រែន។ បើតាមញាណរបស់ខ្ញុំ រឿងនេះនឹងកើតឡើងនៅប៉ុន្មានថ្ងៃទៀត»។

កន្លងមកនេះ, រដ្ឋាភិបាលរុស្ស៊ីបានចោទលោក ចូ បៃដិន អំពីការអុចអាលឱ្យមានភាពតានតឹង ហើយបានចេញសារមួយយ៉ាងច្បាស់ថា ទីក្រុងវ៉ាស៊ីនតោនមិនបានអើពើទៅនឹង ការទាមទារផ្នែកសន្តិសុខរបស់ទីក្រុងម៉ូស្គូឡើយ ហើយក៏បានគំរាមកំហែងដាក់ទណ្ឌកម្ម លើវិស័យអភិវឌ្ឍបច្ចេកវិទ្យាយោធារុស្ស៊ីថែមទៀត។ រុស្ស៊ីកាលពីថ្ងៃព្រហស្បតិ៍សប្តាហ៍នេះ ក៏បានបណ្តេញមន្ត្រីទូតជាន់ខ្ពស់ ២រូប នៃស្ថានទូតអាមេរិកប្រចាំទីក្រុងម៉ូស្គូ ឲ្យត្រឡប់ទៅកាន់ស្រុកកំណើតពួកគេវិញផងដែរ។

គួរបញ្ជាក់ថា ការផ្ទុះអាវុធមួយប្រាវរវាង ក្រុមឧទ្ទាមភាគខាងកើតអ៊ុយក្រែន និងកងទ័ពរដ្ឋាភិបាលទីក្រុងកៀវ កាលពីថ្ងៃព្រហស្បតិ៍សប្តាហ៍នេះ ថ្វីត្បិតតែវាជារឿងដដែលៗ ដែលបានកើតមានឡើងជារឿយៗ ក្នុងអំលុងពេល ៨ឆ្នាំមកនេះមែន ប៉ុន្តែបណ្តាប្រទេសលោកខាងលិច ជាពិសេសសហរដ្ឋអាមេរិក បានចាត់ទុកថា នោះជាការឲ្យតំរុយអំពីការស្វែងរកលេសពីសំណាក់រុស្ស៊ី ដើម្បីបើកការវាយលុកអ៊ុយក្រែន៕