ខ្សែការពារ Chiellini របស់ Juventus ចូលរួមជាមួយក្លិបអាមេរិក Los Angeles FC
(ឡូសអេជេលសេស)៖ ខ្សែការពារសញ្ជាតិអ៉ីតាលី Giorgio Chiellini បានចូលរួមជាមួយក្លិប Los Angeles FC លេងនៅលីគ Major League Soccer (MLS) បន្ទាប់ពីការចាកចេញរបស់លោក ពីក្លិប Juventus។ នេះបើតាមការប្រកាសពីខ្សែការពាររូបនេះ ហើយត្រូវបានចុះផ្សាយ ដោយសារព័ត៌មាន CNA នាយប់ថ្ងៃទី១៣ ខែមិថុនា ឆ្នាំ២០២២។
កីឡាករ Chiellini បានចាកចេញពីក្លិប Juventus ដែលលេងនៅលីគអ៉ីតាលី Serie A នៅពេលចប់រដូវកាលនេះ បន្ទាប់ពីលេង ១៧ឆ្នាំជាមួយនឹងក្លិប ដែលមានមូលដ្ឋាននៅទីក្រុង Turin ជាទីកន្លែងដែលលោកបានបញ្ចប់នៅចំណាត់ថ្នាក់ទី៣ ក្នុងបញ្ជីឈ្មោះកីឡាករ ដែលបានបង្ហាញខ្លួនគ្រប់ពេលប្រកួតរបស់ក្លិប ឈរនៅពីក្រោយកីឡាករ Alessandro Del Piero និង Gianluigi Buffon។
កីឡាករវ័យ ៣៧ឆ្នាំរូបនេះ ក៏បានប្រកាសពីការចូលនិវត្តន៍របស់លោកពីជម្រើសជាតិផងដែរ ដោយការប្រកួតចុងក្រោយរបស់លោក បានធ្វើឡើងនៅឯកីឡដ្ឋាន Wembley កាលពីដើមខែនេះ នៅពេលអ៉ីតាលី ដែលជាម្ចាស់ពានរង្វាន់ជើងឯក European នោះបានចាញ់ក្នុងការប្រកួត Finalissima ក្រោមថ្វីជើងក្រុមម្ចាស់ពានរង្វាន់ Copa America អាហ្សង់ទីន៕
