Mbappe នឹងទទួលបន្ទុកកាន់តែធំ ប្រសិនបើលោកជំនួស Lloris ធ្វើប្រធានក្រុមជម្រើសជាតិបារាំង…
(ប៉ារីស)៖ ខ្សែប្រយុទ្ធ Kylian Mbappe នឹងត្រូវ «ទទួលខុសត្រូវដ៏ធំ» ប្រសិនបើលោកក្លាយជាប្រធានថ្មីនៃក្រុមបាល់ទាត់មាន់គកបារាំង បន្ទាប់ពីមិត្តរួមជាតិ Hugo Lloris បានប្រកាសចូលនិវត្តន៍ពីជម្រើសជាតិ។ នេះបើតាមសម្តីគ្រូបង្គោលក្លិប Paris Saint-Germain លោក Christophe Galtier ហើយត្រូវបានចុះផ្សាយដោយសារព័ត៌មាន Live Score នៅថ្ងៃទី១០ ខែមករា ឆ្នាំ២០២៣។
ស្ថិតក្នុងវ័យទើបតែ ២៤ឆ្នាំ Mbappe បានចូលលេង ៦៦លើករួចទៅហើយឲ្យក្រុមជម្រើសជាតិបារាំង ដោយបានស៊ុតបញ្ចូលទីបាន ៣៦គ្រាប់។
លោកបានឈ្នះពានរង្វាន់ World Cup ក្នុងឆ្នាំ២០១៨ ហើយបានស៊ុតបញ្ចូលទី ៣គ្រាប់ (Hat-trick) ពេលប៉ះអាហ្សង់ទីនក្នុងវគ្គផ្តាច់ព្រ័ត្រនាឆ្នាំ២០២២ ប៉ុន្តែបានបញ្ចប់ត្រឹមក្រុមជើងឯករង ដោយសារចាញ់បាល់ ១១ម៉ែត្រកាត់សេចក្តី។
ខ្សែប្រយុទ្ធក្លិប PSG រូបនេះត្រូវបានគេមើលឃើញថា មានភាពស័ក្តិសម សម្រាប់តួនាទីជាប្រធានក្រុម ប៉ុន្តែលោកអាចនឹងមិនប្រាថ្នានោះទេ ខណៈកីឡាករ Lloris បានកាន់កាប់រយៈពេល ១០ឆ្នាំមកហើយ។
ដូចគ្នានោះដែរ ខ្សែការពារក្លិប Manchester United កីឡាករ Raphael Varane ក៏ជាបេក្ខជនម្នាក់ផ្សេងទៀត ដែលមានឥទ្ធិពលផងដែរសម្រាប់តួនាទីមួយនេះ។ នេះបើតាមសេចក្តីរាយការណ៍របស់សារព័ត៌មានបារាំង ដ្បិត Varane ក៏ធ្លាប់ធ្វើជាអនុប្រធានក្រុមនៅព្រឹត្តិការណ៍ World Cup ថ្មីៗនេះដែរ៕
