មនុស្សស្លាប់ក្នុងហេតុការណ៍បាក់ស្ពាននៅប្រទេសឥណ្ឌា កើនដល់ ១៣៥នាក់ ខណៈប្រតិបត្តិការស្វែងរកជនរងគ្រោះឈានចូលថ្ងៃទី៣

(ញូដេលី)៖ មន្ត្រីរដ្ឋាភិបាលក្នុងតំបន់បានឲ្យដឹងនៅថ្ងៃអង្គារនេះថា ចំនួនអ្នកស្លាប់ដោយសារការបាក់ស្ពាននៅរដ្ឋ ហ្គូចារ៉ាត់ (Gujarat) ក្នុងប្រទេសឥណ្ឌា បានកើនឡើងដល់ ១៣៥នាក់ហើយ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី០១ ខែវិច្ឆិកា ឆ្នាំ២០២២។
លោក JT Pandya មន្ត្រីរដ្ឋបាលជាន់ខ្ពស់នៅទីក្រុងម័រប៊ី (Morbi) បានប្រាប់សារព័ត៌មានថា «បុរសម្នាក់ទៀតដែលបានរងរបួសក្នុងឧបទ្ទវហេតុនេះ ហើយត្រូវបានបញ្ជូនចូលមន្ទីរពេទ្យនោះបានស្លាប់ហើយ ដែលនាំឱ្យចំនួនអ្នកស្លាប់កើនឡើងដល់ ១៣៥នាក់»។

ស្ពានថ្មើរជើងឆ្លងកាត់ពីលើទន្លេ ម៉ាឈូ (Machhu) ក្នុងទីក្រុងម័រប៊ី (Morbi) ពោរពេញទៅដោយអ្នកទស្សនាដែលកំពុងរីករាយនឹងពិធីបុណ្យវិស្សមកាល នៅពេលដែលស្ពាននេះបានបាក់ធ្វើឲ្យធ្លាក់មនុស្សចូលទៅក្នុងទន្លេ កាលពីថ្ងៃអាទិត្យ។
បច្ចុប្បន្នកងកម្លាំងប្រដាប់អាវុធ រួមជាមួយនឹងក្រុមគ្រប់គ្រងគ្រោះមហន្តរាយជាតិ និងក្រុមសង្គ្រោះបន្ទាន់មកពីស្រុកក្បែរៗនោះ ត្រូវបានដាក់ពង្រាយដើម្បីស្វែងរកអ្នកបាត់ខ្លួន និងជួយក្នុងប្រតិបត្តិការជួយសង្គ្រោះ។
គួរបញ្ជាក់ថា មនុស្សជាង ៤០០នាក់ ត្រូវបានគេរាយការណ៍ថាបានស្ថិតនៅលើស្ពានឆ្លងទន្លេ ម៉ាឈូ (Machhu) ស្ថិតនៅក្នុងទីក្រុង ម័រប៊ី (Morbi) កាលពីថ្ងៃអាទិត្យ នៅពេល ដែលស្ពាននេះបានបាក់រលំ។ ស្ពានខាងលើមានទីតាំងស្ថិតនៅក្នុងទីក្រុង Morbi ស្ថិតនៅចម្ងាយប្រហែលជា ២០០គីឡូម៉ែត្រពីទីក្រុង អះម៉េដាបាដ (Ahmedabad) នៃរដ្ឋ ហ្គូចារ៉ាត់ ប៉ុន្តែ មិនទាន់មានការបញ្ជាក់ពីមូលហេតុបណ្ដាលឱ្យស្ពានប្រវែង ២៣០ម៉ែត្រនេះដែលសាងសង់ក្នុងស.វទី១៩ បាក់រលំនៅឡើយទេ៕