AFF U19៖ ប៉ះឡាវយប់នេះ កម្ពុជាត្រូវការឈ្នះ ដើម្បីរក្សាឱកាសប្រជែងកៅអីវគ្គបន្ដ

(ភ្នំពេញ)៖ ក្រុមបាល់ទាត់ជម្រើសជាតិយុវជនអាយុក្រោម ១៩ឆ្នាំកម្ពុជា នឹងបន្ដជួបក្រុម U19 ឡាវ នាវេលាម៉ោង ៧យប់នេះ នៅប្រទេសឥណ្ឌូនេស៊ី ក្នុងប្រកួតទី៣ នៃពានរង្វាន់ AFF U19 Boys Championship 2022 ពូល B។

នេះគឺជាការប្រកួតដ៏សំខាន់ ដែលក្រុមគោព្រៃជំទង់កម្ពុជា ត្រូវការជ័យជម្នះ ដើម្បីរក្សាឱកាសប្រជែងកៅអីវគ្គ ៤ក្រុមចុងក្រោយ បន្ទាប់ពីឆ្លងកាត់ ២ប្រកួតកន្លងមក កម្ពុជាបានឈ្នះ ១ (ឈ្នះសិង្ហបុរី ១-០) និងចាញ់ ១ (ចាញ់ម៉ាឡេស៊ី ២-១)។
សម្រាប់ក្រុមយុវជន U19 ឡាវ បច្ចុប្បន្នពួកគេ ក៏មាន ៣ពិន្ទុស្មើកម្ពុជាដែរ តែពួកគេចំណេញ ១ប្រកួតក្នុងដៃ ពោលគឺទើបប្រកួតបាន ១ប្រកួតប៉ុណ្ណោះ។ រីឯ ២ក្រុមផ្សេងទៀត ក៏មាន ៣ពិន្ទុដែរ គឺម៉ាឡេស៊ី និងទីម័រខាងកើត។ ហេតុនេះ កម្ពុជា ត្រូវពិន្ទុជាចាំបាច់ សម្រាប់ការប្រកួតយប់នេះ ដើម្បីបន្ដក្ដីសង្ឃឹមឡើងវគ្គបន្ដ។
ទន្ទឹមជាមួយគ្នា បន្ទាប់ពីបរាជ័យ ២-១ ក្រោមថ្វីជើងក្រុម U19 ម៉ាឡេស៊ី កាលពីដើមសប្ដាហ៍កន្លងទៅ គេឃើញលោក Koji Gyotoku បានកោះហៅកីឡាករ ៤រូបន្ថែម ដើម្បីជួយក្រុមគោព្រៃជំទង់កម្ពុជា រួមមានអ្នកចាំទី សាំង ហាន់ឃុន មកពីវិសាខា, អៀម រតនា មកពីសូលទីឡូអង្គរ, គង់ លី ហួរ មកពីព្រៃវែង និងកីឡាករ សុខគ្រី សូហ្វាន់ មកពីអង្គរថាយហ្គឺរ។
ក្រោយចប់ការប្រកួតជាមួយឡាវយប់នេះ កម្ពុជា នៅសល់តែ ១ប្រកួតទៀតប៉ុណ្ណោះ ក្នុងពូល B ដែលនឹងត្រូវជួបក្រុម U19 ទីម័រខាងកើត នាថ្ងៃទី១១ ខែកក្កដា ឆ្នាំ២០២២ ខាងមុខ នៅប្រទេសឥណ្ឌូនេស៊ី៕