ប៉ូលិសអ៉ីតាលី រឹបអូសបានឯកសារ ក្នុងការស៊ើបអង្កេតគណនីក្លិប Juventus
(មីឡាន)៖ ប៉ូលិសពន្ធដារអ៉ីតាលី បានរឹបអូសបានឯកសារជាច្រើន ដែលជាផ្នែកមួយនៃការស៊ើបអង្កេត របស់រដ្ឋអាជ្ញាទីក្រុង Turin នៃការចោទប្រកាន់លើគណនីក្លែងក្លាយ នៅឯក្លិបបាល់ទាត់សេះបង្កង់ Juventus ដែលលេងនៅលីគ Serie A។ នេះបើយោងតាមសារព័ត៌មាន CNA ចេញផ្សាយនាថ្ងៃទី២៥ ខែមីនា ឆ្នាំ២០២២។
ឯកសារទាំងនោះ ត្រូវបានរឹបអូស នៅក្នុងការស៊ើបអង្កេតរបស់ប៉ូលិសនៅថ្ងៃពុធ នៅឯការិយាល័យក្រុមហ៊ុនច្បាប់ និងភ្នាក់ងារនាទីក្រុង Turin, Milan និងទីក្រុង Rome ដែលបានផ្តល់ព័ត៌មានណែនាំអំពីកញ្ចប់ប្រាក់ឈ្នួលកីឡាកររបស់ពួកគេ នៅរដូវកាលឆ្នាំ២០១៩-២០២០ និងឆ្នាំ២០២០-២០២១។
ក្លិប Juventus បានបដិសេធក្នុងការបកស្រាយលើបញ្ហានេះ។
ក្លិបដែលគ្រប់គ្រងដោយគ្រួសារឧស្សាហកម្ម Agnelli នេះបានលើកឡើងថា កាលពីពេលកន្លងទៅ ខ្លួនតែងតែប្រព្រឹត្តស្របតាមច្បាប់ និងសហការយ៉ាងពេញលេញជាមួយនឹងអាជ្ញាធរ។
ក្លិប Juventus ដែលមានមូលដ្ឋាននៅទីក្រុង Turin បានលាតត្រដាងនៅក្នុងឯកសារវិនិយោគមួយ កាលពីខែធ្នូ ដែលរដ្ឋអាជ្ញា ពិនិត្យមើលទៅលើគណនីហិរញ្ញវត្ថុរបស់ក្លិប ហើយក៏កំពុងពិនិត្យមើល លើលក្ខខណ្ឌនៃការលក់កីឡាករ Cristiano Ronaldo ទៅកាន់ក្លិប Manchester United ផងដែរ។
ភាគហ៊ុននៅក្នុងក្លិបបានធ្លាក់ចុះ ១.៦ភាគរយ គិតត្រឹមវេលាម៉ោងជាង ៩ព្រឹកថ្ងៃពុធនៅអ៉ីតាលី៕
