ប្រធានាធិបតីចិន លោក ស៊ី ជិនពីង អំពាវនាវឱ្យមានការខិតខំប្រឹងប្រែង ( អស់ពីសមត្ថភាព ) ដើម្បីស្វែងរកអ្នកនៅរស់រានមានជីវិតពីការធ្លាក់យន្តហោះ China Eastern

(ប៉េកាំង)៖ ប្រធានាធិបតីចិន លោក Xi Jinping បានអំពាវនាវឱ្យមានកិច្ចខិតខំប្រឹងប្រែង «អស់ពីសមត្ថភាព» ដើម្បីស្វែងរក និងជួយសង្គ្រោះអ្នកដំណើរនៅលើយន្តហោះរបស់ក្រុមហ៊ុន China Eastern ផ្ទុកមនុស្សចំនួន ១៣៣នាក់ ដែលបានធ្លាក់នៅតំបន់ភាគនិរតីនៃប្រទេសចិន។ នេះបើយោងតាមការចេញផ្សាយដោយ សារព័ត៌មាន CNA នៅថ្ងៃចន្ទ ទី២១ ខែមីនា ឆ្នាំ២០២២។
ដោយបង្ហាញពីការភ្ញាក់ផ្អើល នៅពេលឮព័ត៌មាននៃការធ្លាក់យន្តហោះនេះ លោក Xi បានណែនាំក្រុមមន្ត្រីរបស់លោក ឱ្យចាប់ផ្តើមការឆ្លើយតបជាបន្ទាន់និងភ្លាមៗ ដើម្បីស្វែងរកអ្នកនៅរស់រានមានជីវិត និងស៊ើបអង្កេតមូលហេតុនៃការធ្លាក់យន្តហោះនេះឱ្យបានឆាប់តាមដែលអាចធ្វើទៅបាន។

ប្រព័ន្ធផ្សព្វផ្សាយចិន CCTV បានឱ្យដឹងថា យន្តហោះដឹកអ្នកដំណើរខាងលើ ដែលមានប្រភេទ Boeing 737-800 បានធ្លាក់នៅឯតំបន់ភ្នំ ក្បែរទីក្រុងវូចូវ (Wuzhou) នៃតំបន់ក្វាងស៉ី (Guangxi) ខណៈក្រុមភ្នាក់ងារស្វែងរកនិងជួយសង្រ្គោះ ត្រូវបានចល័តជាបន្ទាន់ ទៅកាន់កន្លែងកើតហេតុ។ យន្តហោះនេះ មានគោលដៅធ្វើដំណើរពីទីក្រុងគួនមីង (Kunming) នៃខេត្តយូនណាន (Yunnan) ឆ្ពោះទៅកាន់ទីក្រុងក្វាងចូវ (Guangzhou) នៃខេត្តក្វាងទុង (Guangdong)។
គួរបញ្ជាក់ថា វិស័យអាកាសចរណ៍របស់ប្រទេសចិន ស្ថិតក្នុងចំណោមប្រទេសដែលមានកំណត់ត្រាសុវត្ថិភាពល្អបំផុត នៅលើពិភពលោក គិតក្នុងអំលុងមួយទសវត្សរ៍ចុងក្រោយនេះ។ ករណីធ្លាក់យន្តហោះលើកចុងក្រោយបង្អស់ ដែលមានមនុស្សស្លាប់នៅចិន បានកើតឡើងកាលពីឆ្នាំ២០១០ នៅពេលមនុស្ស៤៤នាក់ ក្នុងចំណោមមនុស្សសរុប៩៦នាក់ បានបាត់បង់ជីវិត ពេលយន្តហោះធុន Embraer E-190 មួយគ្រឿង របស់ក្រុមហ៊ុនអាកាសចរណ៍ Henan Airlines បានធ្លាក់ ពេលត្រៀមចុះចតនៅឯអាកាសយានដ្ឋាន យីឈុន (Yichun)៕