មនុស្សជាង២,១០០នាក់ទៀតស្លាប់ក្នុងពេលតែមួយថ្ងៃនៅអាមេរិកដោយសារ COVID-19 ដែលជាអត្រាស្លាប់ខ្ពស់បំផុតក្នុងលោក!
(វ៉ាស៊ីនតោន)៖ សាកលវិទ្យាល័យអាមេរិក ចន ហបឃីន (Johns Hopkins) បានបញ្ជាក់ឲ្យដឹងថា ចំនួនមនុស្សស្លាប់នៅរយៈពេល ២៤ម៉ោងចុងក្រោយនេះនៅទូទាំងសហរដ្ឋអាមេរិកមានចំនួនរហូតដល់ ២,១០៨នាក់បន្ថែមទៀតដែលជាតួលេខស្លាប់ច្រើនបំផុតប្រចាំថ្ងៃដំបូងគេលើលោក។
នេះបើតាមការដកស្រង់ដោយសារព័ត៌មាន BBC នាព្រឹកថ្ងៃសៅរ៍ ទី១១ ខែមេសា ឆ្នាំ២០២០។គិតត្រឹមពេលនេះ សហរដ្ឋអាមេរិកមានករណីឆ្លងសរុប ៥០២,៣១៨ករណី ក្នុងនោះស្លាប់ ១៨,៧២៥នាក់ និងជាសះស្បើយវិញ ២៧,៣១៤នាក់។ បើពិនិត្យតាមតួលេខចុងក្រោយពី Worldometer
ក្នុងចំណោមករណីឆ្លងទូទាំងពិភពលោក ១.៦៩លាននាក់ សហរដ្ឋអាមេរិករ៉ាប់រងរហូតដល់កន្លះលាននាក់តែឯងទៅហើយ។ បន្ថែមពីនេះបើពិនិត្យមើលលើអត្រានៃមនុស្សស្លាប់វិញ សហរដ្ឋអាមេរិកនឹងលោតរំលងអុីតាលីក្លាយជាប្រទេសមានមនុស្សស្លាប់ច្រើនជាងគេបំផុតដោយសារជំងឺ COVID-19 ក្នុងពេលឆាប់ៗជាមិនខាន។គួរបញ្ជាក់ថា កាលពីពេលថ្មីៗនេះ
ប្រធានាធិបតីសហរដ្ឋអាមេរិកលោក ដូណាល់ ត្រាំ បានបង្ហាញក្តីសង្ឃឹមថា មហាអំណាចមួយនេះអាចនឹងកាត់បន្ថយចំនួនមនុស្សស្លាប់ឲ្យមកនៅក្រោម ១០០,០០០នាក់នៃការព្យាករណ៍៕
