មេដឹកនាំអ៊ីស្រាអែល សាទរការគំរាមរបស់លោក ដូណាល់ ត្រាំ ចំពោះហាម៉ាស ជុំវិញចំណាប់ខ្មាំង..
(ហ្សេរុយសាឡឹម)៖ មេដឹកនាំអ៊ីស្រាអែល នៅថ្ងៃអង្គារនេះបានសម្តែងការសាទរ ចំពោះការគំរាមកំហែងរបស់ប្រធានាធិបតីអាមេរិកជាប់ឆ្នោត លោក ដូណាល់ ត្រាំ ដែលបានព្រមានពី «ផលវិបាកធ្ងន់ធ្ងរ» នៅក្នុងតំបន់មជ្ឈិមបូព៌ា ប្រសិនបើក្រុមហាម៉ាសមិនដោះលែងចំណាប់ខ្មាំង មុនពេលលោកចូលកាន់តំណែង។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០៣ ខែធ្នូ ឆ្នាំ២០២៤។
រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក Bezalel Smotrich បានចាត់ទុកថា ការគំរាមកំហែងនេះជាវិធីសាស្រ្តដ៏ត្រឹមត្រូវ និងមានសីលធម៌ ដើម្បីដោះស្រាយបញ្ហាចំណាប់ខ្មាំង។ ទន្ទឹមគ្នានេះ លោកជឿជាក់ថា ការបង្កើនសម្ពាធ និងការដាក់ទណ្ឌកម្មទៅលើហាម៉ាស់ និងអ្នកគាំទ្ររបស់វា គឺជាវិធីតែមួយគត់ដើម្បីបង្ខំឱ្យហាម៉ាស់ដោះលែងចំណាប់ខ្មាំង។
ទោះជាយ៉ាងណា ក៏មានការព្រួយបារម្ភថា ការគំរាមកំហែងនេះអាចនាំឱ្យមានការកើនឡើងនៃអំពើហិង្សានៅក្នុងតំបន់។ អ្នកវិភាគខ្លះយល់ថា ការគំរាមកំហែងនេះអាចជំរុញឱ្យហាម៉ាស់ ធ្វើបាបចំណាប់ខ្មាំង ឬប្រើប្រាស់ពួកគេជាខែលការពារ។
គួរបញ្ជាក់ថា ស្ថានការណ៍នៅតំបន់ហ្គាហ្សានៅតែមានភាពតានតឹងខ្លាំង បន្ទាប់ពីសង្រ្គាមរវាងអ៊ីស្រាអែល និងហាម៉ាស់កាលពីឆ្នាំមុន។ ការចរចាដើម្បីដោះលែងចំណាប់ខ្មាំង នៅតែជាបញ្ហាប្រឈម ហើយមិនទាន់មានដំណោះស្រាយច្បាស់លាស់នៅឡើយទេ៕
