រតនគិរី ៖ស្រវឹងកុំបើកបរ! បុគ្គលិកធនាគាម្នាក់ ជ្រុលចង្កូតម៉ូតូបុកគូទគោយន្ត បែកក្បាលចេញខួរ ស្លាប់យ៉ាងអាណោចអាធម៌
បុគ្គលិកធនាគារហត្ថាកសិករម្នាក់ បានស្លាប់ភ្លាមៗ បន្ទាប់ពីជិះម៉ូតូបុកគូទគោយន្តកែច្នៃមួយគ្រឿង បណ្តាលឲ្យបែកក្បាលចេញខួរពេញផ្លូវ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង១និង៣០នាទីយប់រំលងអធ្រាត្រ ឈានចូលថ្ងៃទី១៦ ខែធ្នូ ឆ្នាំ២០១៩នេះ ត្រង់ចំណុចទល់មុខស្លាកសញ្ញាកូបូតា តាមបណ្ដោយផ្លូវជាតិលេខ៧៨ ស្ថិតនៅក្នុងភូមិ១ សង្កាត់កាចាញ ក្រុងបានលុង។
បើតាមការបញ្ជាក់ពីសមត្ថកិច្ចជំនាញបានឲ្យដឹងថា ជនរងគ្រោះមានឈ្មោះ ម៉ី សែន ភេទប្រុស អាយុ២៧ឆ្នាំ ជនជាតិខ្មែរ ជាបុគ្គលិកធនាគារហត្ថាកសិករ(លីមីតធីត) មានទីលំនៅភូមិ១ ឃុំត្រពាំងក្រហម ស្រុកកូនមុំ ខេត្តរតនគិរី បានរងរបួសត្រង់ក្បាលបែកចេញខួរស្លាប់មួយរំពេច។
សមត្ថកិច្ចបានបញ្ជាក់ទៀតថា ជនរងគ្រោះជិះម៉ូតូមួយគ្រឿងម៉ាកហុងដាឌ្រីម C125 ស៊េរីឆ្នាំ2014 ពណ៌ខ្មៅ ពាក់ស្លាកលេខរតនគិរី 1B-2232 ក្នុងទិសដៅពីលិចមកកើត ហើយបានរងការខូចខាតក្បាលម៉ូតូយ៉ាងដំណំផងដែរ។ ចំណែកគោយន្តឃើញស្ថានភាពមិនស្រួល បានដាក់មេប្រ៉ូចបាត់ស្រមោល ហើយបន្សល់ទុកជនរងគ្រោះដេកស្លាប់នៅលើចិញ្ចើមផ្លូវថ្នល់។
បើតាមប្រភពពីសាច់ញាតិជនរងគ្រោះបានឲ្យដឹងថា នៅមុនពេលកើតហេតុ ជនរងគ្រោះបានផឹកស្រាអស់ជាច្រើន ជាមួយនឹងបងប្អូនសាច់ញាតិរបស់ខ្លួន កាលពីវេលាម៉ោង១២ជាង ថ្ងៃទី១៥ ខែធ្នូ ឆ្នាំ២០១៩ ក្រោយមក ក៏បានជិះម៉ូតូចេញពីកន្លែងផឹកស៊ីនៅស្រុកកូនមុំ មកចូលខេត្តវិញ ប៉ុន្តែ មិនបានប្រាប់ប្រពន្ធ និងបងប្អូនឲ្យដឹងនោះឡើយ។
សាច់ញាតិជនរងគ្រោះបានបន្តទៀតថា ទាល់តែព្រឹកឡើងមានការភ្ញាក់ផ្អើលថា ប្តីរបស់ខ្លួនបានស្លាប់បាត់បង់ជីវិតទៅហើយ ក៏បាននាំបងប្អូន និង ម្តាយមកកន្លែងសពកូន ឃើញដូច្នេះ ម្តាយបានដួលសន្លប់ស្ដូកស្ដឹង នាំគ្នាយកប្រេងខ្យល់ឲ្យម្តាយហិត ក្រោយមកម្តាយក៏បានដឹងខ្លួនវិញ។
សមត្ថកិច្ចមូលដ្ឋាន និងសមត្ថកិច្ចជំនាញចរាចរណ៍ខេត្តបានចុះមកត្រួតពិនិត្យនៅកន្លែងកើតហេតុហើយបានសន្និដ្ឋានថា ម៉ូតូជនរងគ្រោះ និងគោយន្តកែច្នៃ បើកបរក្នុងទិសដៅស្របទិសគ្នា ម៉ូតូជ្រុលចង្កូតទៅបុកគូទគោយន្តកែច្នៃយ៉ាងពេញទំហឹងតែម្តង។
ក្រោយមក សមត្ថកិច្ចជំនាញ បានធ្វើការវាស់វែងនៅកន្លែងកើតហេតុ ធ្វើកំណត់ហេតុប្រគល់សាកសពទៅឲ្យក្រុមគ្រួសារយកទៅធ្វើបុណ្យតាមប្រពៃណី។ រីឯម៉ូតូជនរងគ្រោះ ត្រូវបានសមត្ថកិច្ចជំនាញយកមករក្សាទុកនៅការិយាល័យ នៃស្នងការដ្ឋាននគរបាលខេត្ត ដើម្បីចុះស្រាវជ្រាវរកគោយន្តមកឲ្យទទួលខុសត្រូវចំពោះខុសច្បាប់៕
