Man United ជិតសម្រេចការព្រមព្រៀងលើកិច្ចសន្យាតម្លៃ ៥៦លានផោន ក្នុងការផ្ទេរយក De Jong ពី Barcelona….
(មេនឆេស្ទើ)៖ ក្លិប Manchester United បានព្រមព្រៀងខ្លះៗហើយលើកិច្ចសន្យាតម្លៃ ៦៥លានអឺរ៉ូ (៥៦លានផោន) បូកនឹងប្រាក់បន្ថែមជាមួយនឹងក្លិប Barcelona ក្នុងការនាំយកខ្សែបម្រើសញ្ជាតិហូឡង់ Frenkie de Jong។ នេះបើយោងតាមសារព័ត៌មាន BBC ចេញផ្សាយនាថ្ងៃទី២៩ ខែមិថុនា ឆ្នាំ២០២២។
ប្រភពពីក្លិបបានលើកឡើងថា កិច្ចសន្យាមិនទាន់រួចរាល់នៅឡើយនោះទេ ហើយវាមានបញ្ហាសំខាន់ៗជាច្រើនទៀតដែលត្រូវធ្វើការបន្ត។ ប៉ុន្តែការវិវឌ្ឍត្រូវបានគេមើលឃើញថា មានភាពវិជ្ជមាននៅក្នុងអាណត្តិនៃការផ្ទេរកីឡាករ។
កីឡាករវ័យ ២៥ឆ្នាំរូបនេះ គឺជាកីឡាករលំដាប់ទី១ នៃគោលដៅផ្ទេរកីឡាករនារដូវក្តៅនេះរបស់អ្នកចាត់ការថ្មីក្លិប United លោក Erik ten Hag។
ក្លិបក៏បាននឹងកំពុងសំលឹងមើលក្នុងការចុះកិច្ចសន្យាជាមួយនឹងកីឡាករផ្សេងទៀតផងដែរ ប៉ុន្តែការចុះកិច្ចសន្យាជាមួយកីឡាករ De Jong ត្រូវបានគេមើលឃើញថា ជាអាទិ៍ភាព។
សូមជម្រាបថា អ្នកចាត់ការ Ten Hag និងក្រុមកីឡាករ គ្រោងនឹងចាកចេញពីមូលដ្ឋានសម្រាប់ការប្រកួតមុនរដូវកាលនៅប្រទេសថៃ និងអូស្ត្រាលី នៅថ្ងៃទី០៨ ខែកក្កដាខាងមុខ៕
