វ៉េល ឡើងទៅលេង World Cup លើកដំបូង ក្រោយរង់ចាំអស់ ៦៤ឆ្នាំ នៅពេលឈ្នះអ៊ុយក្រែន

(ខាឌីស)៖ នៅទីបំផុត ក្រុមបាល់ទាត់ជម្រើសជាតិវ៉េលបានឡើងទៅលេង World Cup ឆ្នាំ២០២២ ជុំផ្តាច់ព្រ័ត្រជាលើកដំបូង ក្រោយរង់ចាំអស់រយៈពេល ៦៤ឆ្នាំមកនេះ ក៏ព្រោះតែយកឈ្នះគូប្រជែងអ៊ុយក្រែន ១ទល់នឹង០ នៅវគ្គផ្តាច់ព្រ័ត្រនាយប់មិញនេះ។

វ៉េល ដែលមានកីឡាករល្បីៗដូចជា Daniel James, Aaron Ramsey និង Gareth Bale ផងនោះ ត្រៀមបង្ហាញខ្លួននៅប្រទេសកាតាជាលើកដំបូងនាចុងឆ្នាំនេះ ដ្បិតជ័យជម្នះនេះវាជាការធ្វេសប្រហែសចូលទីខ្លួនឯងរបស់ខ្សែបម្រើ Andriy Yarmolenko ដែលកំពុងប្រកបអាជីពក្នុងក្លិបញញួរធំ West Ham United នៅនាទី៣៤។
នេះមានន័យថា វ៉េលបានក្លាយជាក្រុមកូនពៅក្នុងចំណោម ១៣ក្រុមចេញពីទ្វីបអឺរ៉ុបដែលត្រូវទៅបំពេញកៅអីក្នុងពូល B នៃវគ្គ ៣២ក្រុមចុងក្រោយដែលមានអង់គ្លេស អាមេរិក និងអ៉ីរ៉ង់ នៃការប្រកួត World Cup 2022 ចាប់ពីចន្លោះខែវិច្ឆិកា ដល់ខែធ្នូខាងមុខនេះនៅប្រទេសកាតាតែមួយគត់។
ចំណែកឯអ៊ុយក្រែន ដែលកំពុងមានបញ្ហាសង្រ្គាមរាំរ៉ៃក្នុងប្រទេសរបស់ខ្លួនជាមួយរុស្ស៊ីនោះ ក៏មានឱកាសច្រើនណាស់ដែរ ប៉ុន្តែពុំអាចធ្វើបានសម្រេច នៅពេលកីឡាករចាំទី Wayne Hennessey និងខ្សែការពារ Ben Davies ជួយសង្រ្គោះបានរហូត ដ្បិតអ៊ុយក្រែនទើបបានទម្លាក់ម្ចាស់ផ្ទះស្កុតឡេនពីក្នុងវគ្គ ៤ក្រុមចុងក្រោយ ដើម្បីឡើងមកប៉ះម្ចាស់ផ្ទះវ៉េលនៅទីក្រុង Cardiff ទើបចាញ់ ១ទល់នឹង០ នេះ៕