Man United នឹងប៉ះ Liverpool ក្នុងការប្រកួត Pre-season នៅថៃ និងអូស្ត្រាលី
(មេនឆេស្ទើ)៖ ក្លិប Manchester United នឹងប្រកួតទល់នឹងក្រុម Liverpool ជាផ្នែកមួយនៃការប្រកួតមុនរដូវកាលរបស់ពួកគេនៅប្រទេសថៃ និងអូស្ត្រាលី នាខែកក្កដាខាងមុខ។ នេះបើតាមការប្រកាសពីក្លិបលេងនៅលីគ Premier League ហើយត្រូវបានចុះផ្សាយដោយសារព័ត៌មាន CNA នាយប់ថ្ងៃទី៣១ ខែមីនា ឆ្នាំ២០២២ នេះ។
United នឹងជួប Liverpool នៅទីក្រុង Bangkok នាថ្ងៃទី១២ ខែកក្កដា មុនពេលធ្វើដំណើរទៅអូស្តា្រលី ដើម្បីប្រកួតជាមួយក្រុម Melbourne Victory ដែលលេងនៅលីគ A-League នាថ្ងៃទី១៥ ខែកក្កដា និងក្រុម Crystal Palace ៤ថ្ងៃបន្ទាប់។
United កំពុងស្ថិតនៅលំដាប់ទី៦ ក្នុងតារាង Premier League មាន ៥០ពិន្ទុពី ២៩ប្រកួត។ ពួកគេនឹងធ្វើជាម្ចាស់ផ្ទះទទួលក្រុម Leicester City នាថ្ងៃសៅរ៍ចុងសប្តាហ៍នេះ។
ដោយឡែកគូប្រកួតប្រជែង Liverpool កំពុងឈរនៅលំដាប់ទី២ ក្នុងតារាងដោយមាន ៦៩ពិន្ទុ មាន ១ពិន្ទុនៅពីក្រោយក្រុមកំពូលតារាង Manchester City៕
