កុម្មង់បទវ៉ៃឡើងអត់បាន បងកូនក្រមុំគប់កែវស្រាផ្អើលពេញរោងការ

ខេត្តប៉ៃលិន ៖ ខណៈដែលភ្ញៀវប្រុសស្រីកំពុងតែហូបអាហារឆ្ងាញ់មាត់ ដោយអ្នកខ្លះ ដើរទៅជល់កែវជាមួយមិត្តភក្តិយ៉ាងសប្បាយរីករាយ ខ្លះទៀតជល់កែវនៅតាមតុរៀងៗខ្លួននោះ ស្រាប់តែអ្នកចម្រៀងនិងអ្នកភ្លេងនៅលើឆាកឈប់បន្តលេង ដោយរត់ចែកជើងគ្នាព្រាតចុះមកក្រោម ដោយសារតែបងប្រុសរបស់កូនក្រមុំខឹងនឹងមេការក្រុមតន្ត្រីមិនធ្វើតាមសំណូមពររបស់ខ្លួន ខណ:សុំឱ្យអ្នកចម្រៀង និងអ្នកភ្លេងផ្អាក ហើយចាក់បទរីម៉ិច(Remix)របស់ខ្លួនដែលបានជួលគេ លុះម្ចាស់ឆាកមិនធ្វើតាមក៏ទាញកែវស្រាបៀរគប់ផ្អើលតែម្តង ។

ហេតុការណ៍ខាងលើ បានកើតឡើងកាលពីវេលាម៉ោង១០ និង១០នាទីយប់ថ្ងៃទី០៦ ខែកុម្ភ: ឆ្នាំ២០២២ ស្ថិតនៅក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ប្រភពព័ត៌មានពីភ្ញៀវបានឱ្យដឹងថា នៅយប់មុនថ្ងៃកើតហេតុ គេសង្កេតឃើញភ្ញៀវប្រុស ស្រី ក្មេង ចាស់ ជាច្រើននាក់ បាននាំគ្នាទៅចូលរួមហូបអាហារក្នុងពិធីអាពាហ៍ពិពាហ៍របស់កូនក្រមុំមួយកន្លែង ដែលឪពុកមាន ឈ្មោះ ម៉ុន ជាមន្រ្តីនៃមន្ទីរផែនការខេត្តប៉ៃលិន ប្រពន្ធឈ្មោះ ចែថា ជាអាជីវករលក់សាច់គោក្នុងផ្សារ ។

លុះនាំគ្នាហូបតាំងពីល្ងាចរហូតដល់វេលាម៉ោង០៩យប់ ស្រាប់តែបងប្រុសបង្កើតរបស់កូនក្រមុំទៅនិយាយជាមួយមេការក្រុមតន្ត្រីសុំឱ្យឈប់លេងភ្លេងផ្ទាល់ដៃ និងឈប់ច្រៀង ព្រោះរូបគេចង់ប្តូរមកចាក់បទចម្រៀងរីមិច(Remix) ញាក់កន្ត្រាក់អារម្មណ៍រាំលេងសប្បាយជាមួយមិត្តភក្តិវិញ ។ លុះមេការមិនយល់ព្រម ដោយឱ្យក្រុមលេងភ្លេង និងអ្នកចម្រៀងបន្តរហូតដល់ម៉ោង១០យប់ ទើបបងប្រុសកូនក្រមុំទាញកែវស្រា កំពុងផឹកគប់ទៅលើអ្នកចម្រៀងបណ្តាលឱ្យរត់គេចពេញឆាក ។ តែសំណាងល្អ កែវស្រាមិនត្រូវនរណាម្នាក់ បណ្តាលឱ្យរងរបួសនោះទេ

បើតាមការរៀបរាប់ពីលោក ម៉ៃ ជាមេការតន្ត្រីខាងលើ បានរៀបរាប់ឱ្យដឹងថា ៖ ពេលឃើញភ្ញៀវកំពុងតែហូបអាហារ ក្រុមតន្ត្រីរបស់លោកបន្តច្រៀងបទរាំវង់ និងបទញាក់ខ្លះៗ ដើម្បីបង្កភាពសប្បាយរីករាយ ស្រាប់តែបងប្រុសរបស់កូនក្រមុំ មកនិយាយនឹងខ្លួនថា រូបគេបានជួលអ្នកចាក់បទចម្រៀងរីមិច(Remix) អស់៥០ដុល្លារ ដើម្បីយកមកចាក់រាំសប្បាយនៅក្នុងរោងការនេះដែរ មុននឹងភ្ញៀវហូបអាហាររួច ត្រឡប់ទៅផ្ទះ ។

លោកបន្តទៀតថា បើចាក់បទបែបនោះនិងគ្មានភ្ញៀវចាស់ៗណានៅបន្តរាំលេងបានទេ ព្រោះជាបទសម្រាប់
ក្រុមក្មេងស្ទាវប៉ុណ្ណោះ ទើបខាងលោកមិនអនុញ្ញាត ក៏បង្កទៅជាបញ្ហាគប់កែវទៅលើឆាកប៊ិះនឹងត្រូវអ្នកចម្រៀង
របួស។ បើសិនជាគប់ត្រូវចំអ្នកចម្រៀង ឬអ្នកភ្លេងលោកនឹងមិនឱ្យរួចខ្លួននោះឡើយ។ តែក្រោយមកក៏មានការសម្របសម្រួលពីនគរបាលនៃអធិការក្រុងប៉ៃលិន ទើបខាងលោកឱ្យក្រុមតន្ត្រីបន្តច្រៀងកំដរភ្ញៀវរហូតដល់ម៉ោង១២យប់ រួចបិទផ្អាកតែម្តង ៕