មេធំ Google Health លាឈប់ពីក្រុមហ៊ុន ដើម្បីឡើងកាន់តំណែងថ្មីជា CEO ក្រុមហ៊ុនបច្ចេកវិទ្យាសុខភាព…
(អាមេរិក)៖ ថ្នាក់ដឹកនាំជាន់ខ្ពស់មួយរូបរបស់ក្រុមហ៊ុន Google លោក David Feinberg បានប្រកាសនឹងលាឈប់ពីតំណែង ដោយត្រូវ ទៅ កាន់តំណែតថ្មីជានាយកប្រតិបត្តិ (CEO) ក្រុមហ៊ុនបច្ចេកវិទ្យាផ្នែកសុខភាព។ នេះបើយោងតាមការចេញផ្សាយរបស់សារព័ត៌មាន CNBC នៅ ថ្ងៃទី២១ ខែសីហា ឆ្នាំ២០២១។
លោក David Feinberg បច្ចុប្បន្នជាអគ្គនាយករងទទួលបន្ទុកផ្នែក Google Health ដែលវាជាផ្នែកមួយរបស់ Google ក្នុងការផ្ដល់សេវាកម្មសុខភាព ដោយរូបលោកទើបតែចូលកាន់តំណែងនេះកាលពីឆ្នាំ២០១៨ប៉ុណ្ណោះ ហើយបើយោងតាម សេចក្ដីប្រកាស បានឱ្យដឹងផងដែរថា លោក David Feinberg នឹងចូលកាន់តំណែង CEO នៅក្នុងក្រុមហ៊ុនបច្ចេកវិទ្យាសុខភាព Cerner នាខែតុលា ជំនួស លោក Brent Shafer ប៉ុន្តែមូលហេតុផ្សេងមិនត្រូវបានបញ្ជាក់ឱ្យដឹងឡើយ។
លោក David Feinberg បាននិយាយកាលពីខែមិថុនាកន្លងទៅនេះថា លោកពិតជាសប្បាយរីករាយខ្លាំងណាស់នៅពេលដែលលោកបាន ជួយមនុស្សរាប់លាននាក់នៅជុំវិញពិភពលោកតាមរយ:បច្ចេកវិទ្យា (សុខភាព) ហើយលោករំពឹងថា នៅពេលណាមួយលោកនឹង បង្កើតអ្វីដែល ជា ប្រយោជន៍ខ្លាំងបំផុតដល់សុខភាពមនុស្សទូទៅ។
នៅក្នុងសេចក្ដីប្រកាសរបស់ Google មិនបានបញ្ជាក់ថា លោក David Feinberg បានលាឈប់ដោយសារអ្វីឱ្យប្រាកដនោះទេ ហើយក៏ មិនបានប្រកាសថា នឹងមាននរណាមកឡើងកាន់តំណែងនេះជំនួសរូបលោកផងដែរ ខណ:ដែលបច្ចុប្បន្នគម្រោង Google Health មានបុគ្គលិកជាង ៥០០នាក់ កំពុងបម្រើការងារដើម្បីផ្ដល់សេវាកម្មផ្នែកសុខភាព។
គួរបញ្ជាក់ផងដែរថា ក្រុមហ៊ុនបច្ចេកវិទ្យាសុខភាព Cerner ទើបតែបង្កើតកាលពីដើមឆ្នាំនេះប៉ុណ្ណោះ ដោយមាន Brent Shafer ជា CEO និង Donald Trigg ជាប្រធានក្រុមហ៊ុន ហើយបើតាមសេចក្ដីប្រកាសគឺ លោក David Feinberg នឹងមកជំនួសតំណែង Brent Shafer ខណ: Donald Trigg នឹងលាឈប់ពីតំណែងប្រធានក្រុមហ៊ុន៕
