ព្រះសង្ឃ៤ព្រះអង្គបានរងរបួសធ្ងន់ស្រាលក្នុងគ្រោះថ្នាក់ចរាចរណ៍…

ខេត្តរតនគិរី ៖ យ៉ាងហោចណាស់ក៏មានព្រះសង្ឃ៤ព្រះអង្គ បានរងរបួសធ្ងន់ស្រាលក្នុងហេតុការណ៍គ្រោះថ្នាក់ចរាចរណ៍មួយរវាងរថយន្តនិងម៉ូតូកង់បី(ផលិតនៅប្រទេសឥណ្ឌា)ក្នុងទិសដៅស្របទិសគ្នាពីកើតទៅលិច។

ហេតុការណ៍គ្រោះថ្នាក់ចរាចរណ៍ខាងលើនេះកើតឡើងនៅវេលាម៉ោង៨និង១៥នាទីព្រឹក ថ្ងៃទី ៨ខែមីនា ឆ្នាំ២០២១ តាមកំណាត់ផ្លូវជាតិលេខ៧៨ ទល់មុខវត្តត្រពាំងច្រេស ស្ថិតនៅក្នុងភូមិ១ ឃុំត្រពាំងច្រេស ស្រុកកូនមុំ។

យោងតាមរបាយការណ៍របស់អធិការនគរបាលស្រុកកូនមុំបានឲ្យដឹងថា៖ ព្រះសង្ឃ៤អង្គដែលរងរបួសធ្ងន់និងស្រាលមានព្រះនាម១,ព្រះនាមបេប កែវរត្រ័សុវណ្ណសុិន ព្រះជន១៦ព្រះវស្សា រងរបួសធ្ងន់។ ២,ព្រះនាម សាគុណ ភារុណ ព្រះជន១៨ព្រះវស្សា រងរបួសធ្ងន់។ ៣,ព្រះនាម ក ខាំលីនព្រះជន១៥ព្រះវស្សា រងរបួសស្រាល។ និង៤,ព្រះនាម សុខឃឿនសារឿមព្រះជន១៧ព្រះបស្សា រងរបួសស្រាល ព្រះសង្ឃទាំង៤អង្គខាងលើនេះគង់នៅវត្តត្រពាំងច្រេស ស្រុកកូនមុំ ខេត្តរតនគិរី។

របាយការណ៍បានបញ្ជាក់ថា៖ រថយន្តបង្ក ម៉ាកហ្វតពណ៌ទឹកប៊ីច ពាក់ស្លាកលេខរតនគិរី 3A-3233 អ្នកបើកបរក្រោយកើតហេតុបានចុះរត់គេចខ្លួនបាត់ស្រមោល។ រីឯម៉ូតូកង់បីម៉ាកប្រ៊ីស្តារ(ឥណ្ឌា)ពណ៌ក្រហមពាក់ស្លាកលេខភ្នំពេញ1HE-2219 អ្នកបើកបរឈ្មោះ សុខ ឃឿនសាវឿន ភេទប្រុស អាយុ១៩ឆ្នាំ ស្នាក់នៅវត្តត្រពាំងច្រេស គ្មានរបួស បានដឹកព្រះសង្ឃចំនួន៤អង្គ មកដល់កន្លែងកើតហេតុក៏បានប៉ះគ្នាជាមួយនិងរថយន្តខាងលើតែម្តងបណ្តាលឲ្យព្រះសង្ឃដែលគង់លើម៉ូតូកង់បីរងរបួសធ្ងន់ស្រាលទាំង៤ព្រះអង្គ។

ក្រោយកើតហេតុកម្លាំងប៉ុស្តិ៍និងជំនាញបានធ្វើការវាស់វែងកន្លែងកើតហេតុប្រមូលវត្ថុតាងយកមករក្សាទុកនៅអធិការដើម្បីបន្តនីតិវិធីច្បាប់។ ចំណែកព្រះសង្ឃត្រូវបានដឹកបញ្ជូនទៅព្យាបាលនៅមណ្ឌលសុខភាពស្រុកកូមមុំផងដែរ៕