អ្នកស្លាប់ដោយសារវីរុសកូរ៉ូណា បានកើនពី២៥៩នាក់ ឡើងដល់៣០៤នាក់ រីឯអ្នកឆ្លងកើនជិត១៤០០០នាក់
គណៈកម្មាធិការសុខាភិបាលប្រទេសចិន បានឲ្យដឹងថា ចំនួនអ្នកស្លាប់ដោយសារជំងឺរលាកសួត បង្កដោយមេរោគកូរ៉ូណាប្រភេទថ្មី (2019-nCoV) បានឡើងដល់ ៣០៤នាក់ហើយ, បើគិតត្រឹមម៉ោង ៧ព្រឹកថ្ងៃអាទិត្យ ទី២ ខែកុម្ភៈ ឆ្នាំ២០២០ ខណៈតុល្យការអ្នកស្លាប់ កាលពីម្សិលមិញ មានចំនួន២៥៩នាក់។ ហើយថា ករណីអ្នកស្លាប់ទាំងអស់ គឺស្ថិតក្នុងប្រទេសចិន។
ជាមួយគ្នានេះ បើតាមទិន្នន័យរបស់គណៈកម្មាធិការសុខាភិបាលចិន ដែលផ្សាយនៅលើ ncov.dxy.cn បង្ហាញថា តួលេខអ្នកមានជំងឺបានឡើងជិតដល់ ១៤០០០នាក់។ រីឯចំនួនដែលត្រូវបានរាយការណ៍ថា ជាសះស្បើយមានជាង៣០០នាក់។
ខេត្ត Hubei តែមួយ មានអ្នកជំងឺឡើងដល់ជាង ៩០០០នាក់ ក្នុងនោះជិត ៣០០នាក់ស្លាប់ និងជាង២០០នាក់ ជាសះស្បើយ។
ក្រៅពីចិន និងរដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេស២៣ផ្សេងទៀត ដែលមានអ្នកជំងឺកូរ៉ូណាវីរុសរួមមាន៖ ថៃ, ជប៉ុន, សិង្ហបុរី, កូរ៉េខាងត្បូង, អូស្ត្រាលី, ម៉ាឡេស៊ី, បារាំង, សហរដ្ឋអាមេរិក, អាល្លឺម៉ង់, វៀតណាម, អេមីរ៉ាត, អារ៉ាប់រួម, កាណាដា, អ៊ីតាលី, រុស្ស៊ី, ចក្រភពអង់គ្លេស, កម្ពុជា, ហ្វាំងឡង់, ឥណ្ឌា, ណេប៉ាល់, ហ្វីលីពីន ស្រីលង្កា, ស៊ុយអែត និងអេស្ប៉ាញ៕
